Jeffri Justinussen hevði í 2013 verið limur í Føroya Fiskimannafelag í seksti ár, og á landsfundinum hjá felagnum stutt fyri jól fekk hann heiðursgávu.
Tað skrivar heimasíðan hjá Føroya Fiskimannafelag - www.fiskimannafelag.fo
Sámal Poulsen, næstformaður felagsins, handaði heiðursgávuna fyri trúgva tænastu á sjónum øll hesi mongu ár.
Á landsfundinum hugleiddi Jeffri Justinussen eisini um stóru broytingarnar í arbeiðs- og liviumstøðunum umborð á føroysku fiskiskipunum tey seksti árini, hann hevur balst á sjónum.
Gaman í eru føroyskir fiskimenn ofta drúgvir á sjónum, men tó er langt millum teir, ið hava hildið so leingi á sum Jeffri.
Hann fór til skips fyri fyrstu ferð sum 14 ára gamal. Í dag er hann 75 og er enn virkin fiskimaður.
Heiðursgávan er steinpláta við mynd av Norðborg, sum er rist í stein, og eisini fekk Jeffri Justinussen eina gullslipsanál.
Tað er Torgerð Suðuroy, ið hevur gjørt steinplátuna.
