Fróði Benjaminsen verður ikki við, tá landsliðið komandi sunnudag spælir EM-undankappingardyst ímóti Rumenia. Nýggjar arbeiðsumstøður gera, at føroyski liðskiparin ikki verður tøkur hesaferð
Klokkan hálvgum fimm seinnapartin í dag (mánadag) setir føroyska A-landsliðið við monnum kós ímóti Keypmannahavn, og næstu dagarnar fer hópurin at fyrireika seg á Farum Park til EM-undankappingardystin ímóti Rumenia.
Leygarmorgunin verður síðani flogið víðari til Bukarest í Rumenia, og klokkan fimm seinnapartin sunnudagin (føroyska tíð) hittast Rumenia og Føroyar í EM-undankappingardysti á Ilie Aona Stadion í Ploiesti. Men hesaferð verður tað uttan føroyska liðskiparan, Fróða Benjaminsen.
Tíðliga í hesum árinum byrjaði Fróði í nýggjum starvi, og arbeiðsviðurskiftini gera, at liðskiparin ikki verður tøkur til dystin ímóti Rumenia komandi sunnudag.
- Hetta skal ikki skiljast sum eitt endaligt farvæl til landsliðið, men tíverri kann eg ikki verða við hesaferð, sigur Fróði Benjaminsen.
Í fyrstu atløgu hevur Lars Olsen, landsliðsvenjari avgjørt, at eingin nýggjur spælari verður úttikin í staðin fyri Fróða Benjaminsen, ið higartil er skrásettur fyri 83 A-landsdystir fyri Føroyar.
