Bæði føroyingaliðini í bestu svensku hondbóltsdeildini taptu á útivølli í kvøld.
Rói Ellefsen og liðfelagarnir í Hallby taptu í Lund tepurt 30-31 fyri Lugi. Hallby hevði seinasta álopið í dystinum, men tað eydnaðist ikki at javna til 31-31.
Í steðginum var Lugi á odda 16-15.
Rói skoraði fýra mál og legði upp til fimm mál.
Hin føroyingurin hjá Hallby, Pætur Mikkjalsson er aftaná skaða klárur aftur. Men hann hevði bara vant tvær ferðir undan dystinum í kvøld, so tað sást ikki nógv til Pætur í kvøld, men tað fer at koma.
Hallby er nummar átta í deildini við fýra stigum fyri fimm dystir.
Óli Mittún og liðfelagarnir í Sävehof vóru greiðir favorittar at vinna á Skövde á útvølli, men soleiðis gekk ikki.
Skövde vann dystin 33-30. Í steðginum var Skövde á odda 16-14.
Hetta er annað tapið á rað hjá Sävehof, ið er nummar trý í deildini við seks stigum fyri fimm dystir.
Komandi mánakvøld spælir Sävehof á útivølli móti Alingsås.
Leygardagin 14. oktober tekur Hallby móti Malmö á heimavølli.
