Liðini hjá havnarmanninum og hoyvíkinginum hittast í finaluni í EHF European League í Barclay høllini í Hamburg í morgin, sunnudagin klokkan 17.
Jóhan á Plógv Hansen stórspældi og skoraði níggju mál, tá hann og liðfelagarnir í Flensburg-Handewitt vunnu greiðan 38-32 sigur á Dinamo Bukarest úr Rumenia.
Í steðginum var Flensburg á odda 18-11, og í seinna hálvleiki helt Flensburg munin.
Liðið hjá Hákuni West av Teigum, Füchse Berlin vann stórsigur 33-24 á Rhein-Neckar Löwen. Hákun skoraði eitt mál, ið var tað næstseinasta málið í dystinum til støðuna 32-24.
Í steðginum var Füchse Berlin á odda 14-9.
