Liðið hjá Teis og Sjúrði skoraði sigursmálið í allarseinastu løtu

Teis Horn Rasmussen skoraði tvey mál og Sjúrður Olsen skoraði eitt mál tá lið teirra, TM Tønder vann ein sera týdningarmiklan 26-25 sigur á HEI Skæring í dysti á heimavølli í næstbestu donsku hondbóltsdeildini.

Tá ein minuttur var eftir var HEI Skæring á odda 25-24. Teis Horn Rasmussen javnaði til 25-25 tá 34 sekund vóru eftir. Tað eydnaðist Tønder at vinna bóltin frá HEI Skæring, og tá klokkan vísti 59:57 hamraði Jesper Redlefsen bóltin í netið til endaliga úrslitið 26-25, og so kundu Teis, Sjúrður og hinir hjá Tønder stórfegnast um ein sera týðandi sigur. 

Í fyrra hálvleiki var HEI Skæring betra liðið, og teir vóru á odda 16-12 í steðginum. Tá 10 minuttir vóru eftir var HEI Skæring á odda 24-20, so seinastu 10 minuttirnir vóru framúr hjá Tønder. 

Sunnudagin klokkan 14.30 verður føroyingauppgerð í Odder millum liðið hjá Leivi Mortensen, Odder og TM Tønder.