7. septembur kemur Moldova á vitjan á Tórsvølli. Tað var vónbrot at hóma, tá føroyska landsliðið fyrr í ár spældi javnleik 1-1 í Moldova í HM-undankappingini. Til landsliðsúttøkuna til dystirnar móti Ísrael, Danmark og Moldova á Tórsvølli segði Håkan Ericson, føroyskur landsliðsvenjari, at Moldova hevur fingiðfótin fyri seg aftur.
Eitt tekin um tað, kann verða at Sheriff Tiraspol úr Moldova hevur fyri fyrstu ferð nakrantíð vunnið seg víðari til bólkaspælið í Champions League. Tað gjørdu 19-faldu meistararnir úr Moldova við at vinna samanlagt 3-0 á Dinamo Zagreb úr Kroatia.
Tað er ikki heilt óvanligt, at Sheriff Tiraspol vinnur seg víðari í eitt bólkaspæl. Liðið hevur fýra ferðir vunnið seg í bólkaspælið í Europa League. Í 2009/10, 2010/11, 2013/14 og 2017/18. Nú hevur liðið vunnið seg í bólkaspælið í Champions League.
Lutakastið verður í dag klokkan 17. Sheriff Tiraspol er við sínum 14.500 “UEFA stigum” tað lægst styrkismetta liðið í lutakastinum. Síðani kemur Wolfsburg úr Týsklandi við sínum 14.714 UEFA stigum. Síðani kemur svenska Malmö FF við 18.500. Eftir hetta er talan um stór feløg sum AC Milan, ið hevur heili 31.000 UEFA stig.
Sermerkt við Sheriff Tiraspol er, at felagið er stovnað í 1997 og hevur vunnið meistaraheitið í 19 av teimum 24 árunum liðið hevur verið til. Tað bleiv stovnað sum Tiras Tiraspol, men skifti navn til Sheriff eftir høvðusstuðlinum.
