Danmark
Tey trý feløgini í næstbestu donsku deildini, sum hava føroyskt íslett, spældu í vikuskiftinum javnleik.
Longu fríggjakvøldið høvdu Óli Johannesen og teir í Hvidovre vitjan av einum øðrum felag í høvuðsstaðnum. Brønshøj hevur ikki so stórar ambitiónir, sum teir í Hvidovre hava. Men kortini hava teir í Brønshøj staðið seg væl betur higartil í hesum kappingarárinum, enn teir í Hvidovre hava gjørt.
Hjá Hvidovre gekk tað fríggjakvøldið, sum tað so ofta fyrr í hesum kappingarárinum hevur gjørt. Teir komu á odda og øktu til 2?0, men kortini megnaðu teir ikki at fáa meiri enn eitt stig. Óli Johannesen tykist vera ein av lyklaspælarunum hjá Hvidovre. Liðformaðurin á føroyska landsliðnum setti hol á málskjótingina í 19. minutti, og Hvidovre økti í 36. minutti. Í 2. hálvleiki minkaði Brønshøj um munin í 55. minutti, og teir javnaði átta minuttir undan leikloki.
Øssur Hansen var allar 90 minuttirnar á B93 liðnum, sum var sera heppið at fáa eitt stig burturúr, tá Farum vitjaði. B93 kom framum við hepnum langskoti longu í 8. minutti. Farum javnaði í 29. minutti eftir hornaspark, og teir kundu væl havt skorað bæði tvey og trý mál afturat.
Randers Freja, sum hevur Atla Gregersen í hópinum, megnaði 2?2 í Horsens. Øll málini vórðu skorað í 2. hálvleiki.
Synd er at siga, at áhugin millum áskoðararnar er serliga stórur fyri næstbestu donsku deildini. 612 sóu Óla Johannesen og teir spæla, 714 vitjaðu á Eysturbrúgv, og í Horsens vóru 718 áskoðarar.
