Tey, sum hava hug at uppliva G! Festivalin á ein øðrvísi hátt, hava í ár møguleikan at bíleggja sær pláss umborð á frítíðarskipinum M/S Thorshavn, sum fer at liggja á Gøtuvág sum gourmetskip.
- Her fært tú møguleikan til eina serstaka uppliving, og tú fært høvi at njóta góðan mat og drekka umborð á stásiliga skipinum.
Tað sigur Hugin Reistrup, sum samskipar mattiltøkini á G!, ið ávikavist Áarstova, Hvonn og Etika standa aftanfyri.
- Tað verður fríggjadagin og leygardagin á G!, at høvi verður at fylgja festivalinum av Thorshavn.
Umframt, at skipið fer at liggja á vánni hesar báðar dagarnar, verða eisini onnur matstøð og mattiltøk á G!, sum eitt nú Hvonn og Etika standa aftanfyri.
Hugin Reistrup sigur, at gestirnir sleppa umborð á Thorshavn í árabáti.
- Fólk verða rógvin av sandinum og út á skipið, og tá tey koma umborð, verða tey móttikin við onkrum góðum.
Hann sigur, at ein trírættað matarskrá við fiskasúpan, áarstovubógvi og rabarbutriflu verður serverað umborð á M/S Thorshavn.
Hugin Reistrup lesur medisin, og í frítiðini tekur hann sær av at samskipa mattiltøk fyri eitt nú Áarstovu, Hvonn og Etika.
