Tað er ikki uttan orsøk, at niðurstøðan í nýggju kanningini hjá SU, Statens Uddannelsesstøtte er, at tey ungu, ið fylla lærustovnarnar í danska kongaríkinum í dag, sera treyðugt taka lestrarlán. Tað skrivaði danska blaðið Aktuelt í gjár. Tvey út av trimum lesandi siga, at tey tora ikki at taka lán. Slakur helmingurin av teim spurdu hava ikki nógv gott at bera tilboðnum um lestrarlán, meðan 44 prosent taka til takkar við tilboðnum uttan stórvegis stúran.
Tað eru ringu royndirnar hjá foreldrunum at teim ungu lesandi í dag, sum geva afturljóð. Í sjeyti og áttati árunum tóku hópin av lesandi lestrarlán, sum ikki vórðu endaliga goldin fyrr enn langt upp í níti árini. Rentan tá lá um 20 prosent. Hetta vóru bankalán, sum vórðu rentað og rentað meðan tey lesandi stríddu seg ígjøgnum útbúgvingina.
Hóast tíðin er farin frá hesum lánum og tey í dag eru væl bíligari, rinda framvegis 20.000 danir hesi dýru lánini, sum fóru í søguna í 1992. Lestrarlán eru ikki longur nøkur fella, men tað letur til vera sera trupult at broyta ringa umdømið, lestrarlánið hevur fingið. Rentan er í dag fýra prosent í lestrartíðini, og eftir lokna lestrartíð lækkar hon.
Lesandi á donskum lærustovnum fáa í dag 3800 krónur um mánaðin í studningi, og hava møguleikan at taka helmingin av hesi upphædd í láni um mánaðin.
Kanningin hjá Statens Uddannelsesstøtte byggir á samrøður við 800 lesandi. Fyri at sleppa frá at taka lán velja nógv at arbeiða við síðuna av, men tað ráða fleiri lærustovnar frá at gera ov nógv av. Í øllum førum fyrsta hálva árið, tí tá ræður um at fylgja við. Ikki ber fakliga, men eisini sosialt.
