3.700 krónur røkkur ikki til mest neyðturviligu útreiðslurnar.
Tað vil Meginfelag Føroyskra Studenta vera við. Lestrarstudningurin til lesandi í Føroyum er snøgt sagt ov lítil.
- Fyri hendan peningin skal tann lesandi gjalda húsaleigu, matvørur, skúlatilfar, kringvarpsgjald, og so framvegis. Tú nýtist ikki at vera talsnillingur fyri at ásanna, at stuðulin á ongan hátt røkkur til tær mest neyðturviligu útreiðslurnar. Tey lesandi í Føroyum noyðast annaðhvørt at eiga pening á bók ella lána pening fyri at fáa endarnar at røkka saman, skrivar Meginfelag Føroyskra Studenta í tíðindabrævi.
Felagið vísir eisini á munin millum lesandi í Føroyum og Danmark. Føroysk lesandi fáa lestrarstudning 11 ferðir um árið.
- Í Danmark verður stuðul veittur til tey lesandi alt árið 12 mánaðir. Tann árliga stuðulsupphæddin er 65.862 krónur, og vil ein lesandi, ið er 18 ár ella eldri og uttan starv, gjalda umleið 7.000 krónur í skatti av stuðlinum, soleiðis at netto-stuðulin verður 58.862 krónur árliga. Í Føroyum er árligi stuðulin skattafríður, men upphæddin er bert 41.107 krónur ella heili 17.775 krónur minni enn í Danmark. Í prosentum er hetta 30 prosent minni. Verður so tikið við, at kanningin hjá Hera á Rógvi vísir, at Føroyar í miðal eru 14 prosent dýrari at liva í enn Danmark, so gevur hetta ein reellan mun á heili 40 prosent!, skrivar Meginfelag Føroyskra Studenta.
