Tað hendir av og á, at okkurt lamb, sum var væntandi um várið, ikki kemur fyrr enn um heystið. Soleiðis er við hvíta og svarta lambinum á hesi myndini.
Svarta og næsahvíta ærin, sum eigur lambið, lembdi ikki í vár, tá lembingin annars var fyri, men um hálvan august í ár.
Í vetur gekk ærin í krubbu saman við brundi, men fekk einki lamb í vár. Tíðliga í summar varð hon slept út í eitt gerði á Sondum á Sandi saman við veðragjólingum.
Eingin hevði væntað, at ærin fór at lemba, men um miðjan august, tá flestu vóru liðug við sína summarfrí, lembdi hon gimburlambið á myndini.
Ær og lamb ganga framvegis í gerðinum á Sondum, har tey síggja út til at stórtrívast.
