Í fleiri ár hevur verið roynt at lata virkið upp aftur, men higiartil hevur alt verið til fánýtis.
Og Hans Joensen, formaður í Havnar Arbeiðsmannafelag, ásannar, at enn røkist einki fyri, at virkið yvirhøvur letur upp aftur.
Hann sigur, at alt er klárt til at fara undir framleiðslu. Virkið er klárt og maskinurnar eru tøkar. Tað einasta sum manglar, eru íleggjarar og onkur at reka virkið.
- Men tað tykist ikki sum um at nakar áhugi er, hóast alt er klárt, sigur Hans Joensen.
Og formaðurin í Havnar Arbeiðsmannafelag undrast á, hvar vinnulívsfólkið í Havn eru.
- Vit mangla eldsálirnar, men vit vita ikki, hvar tær eru, staðfestir hann.
Og hann heldur eisini, at rávøran trýtur ikki. Hóast tað ikki er so nógvur fiskur at fáa undir Føroyum, er góður fiskiskapur aðrastaðni, so at tað átti at borið til at innflutt frystan fisk til virkingar á Bacalao.
Hans Joensen sigur, at tey hava kortini ikki mist allar vónir um at fáa virksemi aftur á virkinum.
- Tann, sum hevði havt hug at fari undir virksemi á virkinum, kemur til skorin klæðir, tí alt er klárt at taka ímóti fiski.
- Sostatt verður ikki talan er ikki um at møguligir íleggjarar fyrst skulu brúka stórar upphæddir upp á at byggja virkisbygning og útvega maskinur.
- Tí dugi eg ikki at síggja, hví tað ikki skal bera til at fara undir lønandi vinnu á virkinum.
Hans Joensen heldur, at tað hevði klætt Havnini við einum fiskavirki í Havn, tí tað hevði gjørt lívið í býnum fjølbroyttari.
