Skaðin, sum Høvdavirkið í Leirvík hevur fingið í storminum seinnapartin, er rættiliga umfatandi.
Tað var klokkan 17 seinnapartin, at alarmsentralurin fekk boð um, at tekjan á Høvdavirkinum reiv í storminum.
Sløkkiliðið í Eysturkommunu varð mannað alt fyri eitt og fór á staðið at bøta um skaðan og at tryggja, at tað ikki varð enn verri.
Og teir fáa ein langan arbeiðsdag, tí teir sleppa ikki til húsar aftur fyrrenn einaferð mitt í nátt, sigur brunaumsjónarmaðurin, Søren Djurhuus.
Hann sigur, at talan er um einar 200 metrar av tekjuni, sum eru farin í luftina.
- Vit hava funnið nakrar heilt fáar plátur aftur, restin er horvið, sigur hann.
Teir hava ikki fingið fráboðan um, at pláturnar, sum eru farnar á flog, hava elvt til skaða aðrastaðni.
Nú eru teir í ferð við at tekja aftur og at fáa tað tætt, so at stormurin ikki ger enn størri skaða og hann væntar ikki, at tað verður fyrrenn einaferð klokkan 2-3 í nátt, at teir sleppa til húsar aftur.
Søren Djurhuus sigur, at tað eru rættiliga harðar hvirlur av landsynningi, sum ikki er góð ætt á Hagaleitið, har Høvdavirkið er.
Hann sigur frá enn meiri vindi í nátt og í morgin og tískil fara teir ikki til húsar, fyrrenn tekjan er væl og virðiliga tryggjað.
