Leif Sørensen, undangongumaður innan nýggjari føroyska matlist, varð í gjár heiðraður í Danmark.
Tað hendi á Kurhotel Skodsborg, har Den danske Spiseguide helt The Nordic Prize galla.
Undangongumaðurin innan føroyska gastronomi verður nú ”ikoniseraður”, sum tey kalla tað, av Den danske Spiseguide.
Trýst á pílin undir myndini fyri at hoyra samrøðuna við Leif Sørensen.
Sum grundgeving fyri at heiðra føroyska kokkin verður sagt, at orsøkin er hansara einastandandi og áhaldandi gourmet-innsastur á føroyska-norðurlendska matstovupallinum, sum hevur fingið leiðandi evropiskar gastronomiserfrøingar til spíla eyðugi.
– Fyrst næm hann sær kokkaútbúgving, síðani stovnaði hann matstovuna Gourmet í Havn, áðrenn hann gjørdi stóra innsatsin á KOKS á Hotel Føroyum. Leif var eisini ein teirra, sum skrivaði undir norðurlendska manifestið í 2003, skrivar Bent Christensen, ritstjóri á Den Danske Spiseguide um Leif Sørensen.
Á listanum hjá Den danske Spiseguide, sum Leif Sørensen nú verður nevndur á, eru matir menn sum:
Søren Gericke
Jens P. Kolbeck
Jan Hurtigkarl
Michel Michaud
Jean-Louis Lieffroy
Elvio Milleri
Hans Beck Thomsen
Erwin Lauterbach
Rene Redzepi
Jan Restorff
og Claus Meyer
Á hesum lista, sum við Leif Sørensen telur 12 mans, eru nú tveir føroyingar. Tí umframt Leif Sørensen er Jan Restorff, restauratiónssjefur á Søllerød Kro, eisini á listanum. Jan Restorff er sonur Johan Restorff, fyrrverandi eigara og stjóra á Hotel Hafnia.
Heiðurin sum ársins matstova í Norðurlondum fekk sushi-matstovan Sabi Omakase í Stavanger, sum eisini fekk sína fyrstu Michelin-stjørnu fyrr í ár, tá Koks, sum Leif Sørensen legði lunnar undir, fekk sína.
