Leicester rennur eftir Liverpool

Leicester City er í løtuni fremsti avbjóðarin hjá Liverpool í stríðnum um enska meistaraheitið. Í gjár settu bæði Manchester City og Chelsea stig til og tað var um reppið, at Leicester eisini setti stig til í dag, men við einum málið í yvirtíðini vann Leicester 2-1 á Everton.

Everton kom annars á odda í fyrra hálvleiki, men í seinna hálvleiki skoraðu Jamie Vardy og síðani innskifti Kelechi Iheanacho í yvirtíðini. Málið fór til VAR, tí illgruni var um rangstøðu, men so var ikki.

Freddie Ljungberg fekk ikki eina dreymabyrjan upp á sína tíð sum fyribilsvenjari hjá Arsenal, sum fyrr í dag spældi 2-2 móti Norwich á útivølli. Her var eisini ein VAR-støða, tá Pierre-Emerick Aubameyang skoraði til 1-1 upp á brotsspark. Tim Krul bjargaði í fyrstu atløgu, men brotssparkið skuldi sparkast umaftur, tí ein spælari hjá Norwich var eitt vet inni í brotsteiginum. Og hann var fyrstur á returinum. Manchester United spældi 2-2 á heimavølli móti Aston Villa og Wolverhampton og Sheffield United deildu eisini stigini í einum 1-1 javnleiki.

Liverpool er nú 11 stig frammanfyri Manchester City, meðan Leicester City við sigrinum í evstu løtu í dag framvegis er átta stig aftanfyri Liverpool. Fult umfar er mitt í viku.