Tá Karsten Hansen tók við sum landsstýrismaður í heilsumálum í 2011 varð samstundis boðað frá, at hann fór at leggja frá sær eftir at hava sitið tvey ár í sessinum.
Hetta endurtók Jenis av Rana, formaður Miðfloksins herfyri, tó at Karsten Hansen ikki hevur havt somu fatan.
Men í tíðindaskrivi týsmorgunin boðar Miðflokkurin frá, at Karsten Hansen kortini ikki leggur frá sær.
Tíðindaskrivið er soljóðandi:
»Á fundi í floksstjórn Miðfloksins 3. apríl varð samtykt, at verandi landsstýrismaður floksins, Karsten Hansen, heldur fram í starvinum sum landsstýrismaður í heilsumálum.«
Skrivað undir vegna Miðflokkin hava Mia av Kák Joensen, floksstjórnarleiðari og Jenis av Rana, floksformaður. Við útvarpið segði Jenis av Rana, floksformaður, at tað var eftir ynski frá Karsten Hansen sjálvum, at hann helt fram í landsstýrisstarvinum.
Karsten Hansen er 69 ára gamal – hann fyllir 70 ár tann 18. august. Hann er føddur í Søldarfirði.
Karsten Hansen var býráðslimur í Klaksvík frá 1989-98 fyri Tjóðveldisflokkin. Hann starvaðist sum sjómaður 1959-62 og innan handil 1963-66. Hann er útbúgvin løgreglumaður, og varð løgreglumaður í 1966, var støðleiðari 1975-85 og sýslumaður frá 1985 til hann fór í farloyvi, tá hann varð landsstýrismaður í 1889.
Hann var landsstýrismaður í fíggjar- og búskaparmálum 1998-2002 og landsstýrismaður í fíggjarmálum 2002-2003 umboðandi Tjóðveldisflokkurin. Hann var aftur landsstýrismaður í fíggjarmálum 4. februar til 26. september 2008 umboðandi Miðflokkin. Hann hevur verið landsstýrismaður í heilsumálum síðani 14. november 2011, umboðandi Miðflokkin. Hann var valdur á ting í 2004 fyri Tjóðveldi og í 2008 fyri Miðflokkin. Hann fall á valinum í 2011.
Tá hetta valskeiðið er av, hevur Karsten Hansen sitið í landsstýrinum í góð 10 ár. Hann var løgtingsmaður í sjey ár.
