Kanningar
Í blaðnum í gjár undrast fyrrverandi landsstýrismaðurin hjá Tjóðveldisflokkinum, Signar á Brúnni stórliga á, hví leiðslan í Tjóðveldisflokkinum er so tigandi í málinum, sum hevur tikið seg upp um embætisførsluna hjá Jørgen Niclasen, landsstýrismanni. Hann vísir til, at hetta var so ikki støðan, tá ivi tók seg upp um hansara embætisførslu og hann mátti fara frá. Høgni Hoydal sigur við Sosialin, at hann hevur onga viðmerking til tað, sum Signar á Brúnni førir fram. -Tað eru tó fleiri onnur, sum hava spurt, hví flokkurin ikki hevur verið meira frammi í hesum málinum. Vit siga tað vit halda innanhýsis. Vit hava víst í slíkum málum, at vit taka tey upp innanhýsis og viðgera tey í flokkinum og millum teir persónar, sum eru partar av einum máli. Tað vóna vit, at aðrir gera eisini. Høgni Hoydal sigur, at teir hava heldur ongantíð fyrr verið úti alment og úttalað seg um mál, sum liggja hjá øðrum flokkum, øðrum landsstýrismanni ella løgmanni. Hann vil heldur ikki fara út og siga nakað alment um málið, fyrr enn tað hevur verið fyri í løgtinginum.
Høgni Hoydal leggur aftrat, at Tjóðveldisflokkurin letur bóltin liggja, har hann eigur at liggja, til hann so verður spældur yvir til flokkin.
-Hvar eigur bólturin at liggja í løtuni?
-Hetta er eitt mál um eftirlit við landsstýrismonnum. Tað verður gjørt antin av løgmanni ella av løgtinginum. Løgmaður hevur so heldur ikki tikið málið upp av sínum eintingum. tí er tað tikið upp av løgtinginum. Tá liggur bólturin formelt í tinginum, har kanningarstjóri er settur. Men av tí at løgtingið ikki er saman liggur bólturin eisini hjá løgmanni, landsstýrismanninum og flokki teirra og hava teir í hesum førinum fingið eina rættiliga langa umhugsingartíð.
Høgni Hoydal vísir annars aftur gitingum um, at flokkurin vil ikki úttala seg alment um málið av ótta fyri at tað skal fáa avleiðingar fyri samgongusamstarvið. -Vit gera einki øðrvísi her enn vit gera í øllum øðrum málum. Tá mál hava verið fyri, sum snúgva seg um landsstýrisfólk hjá Tjóðveldisflokkinum, sum hava havt trupulleikar, so hevur tað ikki altíð verið av løgfrøðiligum slag. Tað er eisini tá, at tingini eru mett politiskt, men vit hava ongantíð verið úti og úttalað okkum um landsstýrisfólk hjá øðrum flokkum. Vit hava tó gjørt tað, tá málini enda í løgtinginum.
Høgni Hoydal hoydi ikki tjakið í útvarpinum mikudagin, men tá talan er um kanningar av hesum slag vísir hann til tey amboð, sum vit hava í Stýrisskipanarlógini. Hetta aktuella málið er so kannað eftir teimum reglum, sum Stýrisskipanarlógin fyriskrivar og so má tað gerast ein niðurstøða út frá tí.
Hvat viðvíkur tjakinum um jura kontra politikk, so sigur hann, at tað altíð er ein politisk metan í øllum málum. Tað var tað eisini í málunum viðvíkjandi Signar á Brúnni og Tórbjørn Jacobsen á sinni. Man kann ikki fáa eitt facit frá juristum. Man má meta um tingini politiskt, um tað skapar trupulleikar fyri starvið hjá einum landsstýrismanni oa. Tað merkir ikki, at nakar hevur gjørt nakað juridiskt skeivt. Tað er sum so tað sama sum hendi við málinum um Signar á Brúnni. Signar er jú langt síðani fríkendur fyri nakað juridiskt. Tað, sum hann sjálvur segði, tá avgerðin varð tikin, var, at hann vildi ikki sita í eini støðu, har hann var undir eini konstantari ákæru og ikki fekk arbeitt. Hann vildi gjarna ganga fram sum eitt gott fyridømi, og tað haldi eg eisini hann gjørdi. Signarmálið var tað fyrsta í føroyskum politikki, sum fekk avleiðingar. Og tað hevur gjørt, at eyka fokus hevur verið á hetta og at onnur seinni hava verið noydd til at taka støðu sum hann eisini gjørdi, tá hann valdi at fara frá.
-Spurningurin er so, um hann valdi ella varð tvingaður at fara frá?
-Tað er jú altíð ein kombinatión, sum eisini kemur fram nú. Tá kundi málið eisini verið endað í løgtinginum. Tað málið var heldur ikki ein spurningur um jura men um eina politiska meting, um tað var skilagott ella ikki og um man við tí kundi fáa betri arbeiðsumstøður hjá landsstýrismanninum, hjá samgonguni oø.
-Løgmaður sigur, at landsstýrið framdi justitsmorð móti Signar á Brúnni, og Signar spyr í blaðnum í gjár, um tað ikki eigur at fáa fylgjur fyri tað landsstýrið?
-Hatta má vera eitt mál millum Signar og løgmann. Eg vil ikki gera viðmerkingar til tað, sum løgmaður hevur sagt.
-Tú følir sostatt ikki, at tú sum varaløgmaður og partur av landsstýrinum eisini var við til at fremja umrødda justitsmorð móti Signar á Brúnni?
-Tað vil eg als ikki gera viðmerkingar til. Tað málið hevur einki við hetta at gera, og tí má man taka tað upp í øðrum samanhangi. Eg ætli mær so ikki inn í tað tjakið.
