Tað er full skrúva fram hjá Víkingi. Síðani Eyðun Klakstein tók við sum venjari, hevur liðið spælt fýra dystir í VFF kappingini. Víkingur hevur spælt ein javnan – 2-2 í Runavík – og Víkingur hevur vunnið tríggjar ferðir.
Síðsti sigurin var ídag, tá ið KÍ fór úr Sarpugerði við 5-3 tapi. Hetta var aðru ferð, at Víkingur hevur vunnið 5-3. Fyrra ferðin var 11. januar á Skála. Hetta var onnur ferðin, at KÍ einki fekk burturúr. Fyrra ferðin var í Trongisvági fyri einari viku síðani, tá ið TB vann 2-1. KÍ hevur vunnið 2-0 ímóti B36, spælt 3-3 ímóti HB, og í dag tapti KÍ 5-3 ímóti Víkingi.
Klaksvíkingar vóru frammanfyri 3-2 eftir fyrra hálvleik, men so svaraði Víkingur aftur og vann 5-3.
Álopsspælið riggaði betri enn verjuspælið. Í tí er nógv eftir at fáa uppá pláss.
Andreas Lava Olsen hevur verið sera væl upplagdur í fyrstu venjingardystunum. Í dag skoraði hann trý mál – til 1-1, 3-3 og 5-3. Hini málini hjá Víkingi skoraðu Sølvi Vatnhamar til 2-2 og Lukasz Cieslewicz til 4-3.
Hjá KÍ skoraði Alseeio Hyseni til 1-0, Boris Dosljak til 2-1 og Patrik Johannesen til 3-2.
Víkingur legði fyri í hesi uppstilling: Elias Rasmussen – Ari Olsen, Vukasin Tomic, Noah Mneney, Bergur Gregersen – Bogi Reinert – Petersen, Gunnar Vatnhamar, Sølvi Vatnhamar – Lukasz Cieslewicz, Andreas Lava Olsen, Ingi Jonhardsson. Í seinna hálvleiki vórðu skiftir inn: Elias Lervig, Hjalti Strømsten, Rani Hansen, Olaf Bárðarsson, Geza David Turi, Arnbjørn Svensson, og Tonni Thomsen.
KÍ legði fyri í hesi uppstilling: Kristian Joensen - Jóannes Kalsø Danielsen, Jesper Brinck, Deni Pavlovic, Ísak Simonsen – Sebastian Avanzini, Jákup B. Andreasen, Alessio Hyseni, Boris Dosljak – Patrik Johannesen, Ole Erik Midtskogen. Í seinna hálvleiki vórðu skiftir inn Steinbjørn Olsen, Børge Petersen, Ólavur Niclasen og Gulak Jacobsen.
