Tað sigur Henrik Old, løgtingsmaður, í áheitan á løgmann. Hann vísir á, at sum nú er standa pengar tøkir, 1,2 milliónir krónur til menningarhjálp og 200.000 krónur til neyðhjálp, sum ikki eru brúkta.
Seinastu dagarnir hevur felagsskapurin Dansk Flygtningehjælp boðað frá, at støðan í flóttafólkalegunum í Libanon er merkt av neyð og vesaldómi.
Tað sigur Henrik Old, sum ætlaði at seta løgmanni ein spurning um málið. Men av tí at løgmaður hevur boðað frá, at hann er burturstaddur á tingfundinum í morgin, hevur Henrik Old sett spurningin sum ein vanligan spurning.
Henrik Old vísir á, at størsti parturin av fólkunum, ið eru flýdd til Libanon eru kvinnur og børn úr Sýria. Eisini er boðað frá at hetta er størsta nøgdin av flóttafólkum síðani annan veraldarbardaga. Sambært ST eru meir enn tríggjar mió. fólk flýdd úr Sýria.
Víst verður eisini á, at í Libanon verður støðan verri nú kuldin ger um seg, og eru flóttafólkalegurnar ikki brynjaðar til at hjálpa øllum flóttafólkunum, ið ongan annan útveg høvdu enn at leita sær av landinum.
Í síðstu viku vísti omanfyri nevndi felagsskapur á, at orsaka av at londini, sum hava játta hjálp, einans hava latið ein part av teimum játtaðu pengunum, er støðan bert versnað fyri kvinnurnar og børnini, ið halda til har.
Sum nú er, eru pengar tøkir – 1,2 mió. kr. til menningarhjálp og 200.000 til neyðhjálp – ið kundu verið brúktir til at hjálpa hesum kvinnum og børnum. Nú bert fáir dagar eru eftir av árinum átti írestandi peningur, ið er settur av til neyð- og menningarhjálp, at verið latin flóttafólkum í Libanon.
– Í hesum sambandi vil eg heita á løgmann, at skipa fyri at peningurin verður latin hesum neyðstøddu flóttafólkum, sigur Henrik Old, løgtingsmaður.
