Í Kina hevur stjórnin givið boð um, at meiri enn 2.000 verksmiðjur skulu latast aftur, tí tær eru ikki tíðarhóskandi longur. Sagt verður, at verksmiðjurnar dálka ov illa og eru ov orkukrevjandi.
Í boðunum frá stjórnini stendur, at 2.087 verksmiðjur innan stál-, kol-, aluminium- og glasídnaðin skulu lata aftur um mánaðarskiftið september-oktober.
Verksmiðjur, sum ikki gera eftir boðunum, missa sína fígging, og tær fáa heldur ongar almennar góðkenningar.
Kinesisku myndugleikarnir søgdu í síðstu viku, at landsins orkunýtsla er vaksin munandi tað seinasta hálvárið, hóast landið hevur sett sær fyri at gagnnýta orkuna betur. Tí fær Kina ilt við at røkka sínum máli um at minka orkunýtsluna í árunum frá 2006 til í ár, skrivar AP.
