Hanus Jacobsen úr Víkingi er ikki longur partur av landsliðshópinum, sum skal spæla móti Norðurírlandi og Finnlandi. Hann hevur ein skaða í knænum.
- Vit hava í dag sent Hanus Jacobsen heim. Hann hevur ein skaða í knænum, sum hann fekk til venjing týsdagin. Tí er hann ikki við longur, sigur Lars Olsen, landsliðsvenjari.
30 ára gamli vinstri bakkurin vandi fyri seg sjálvan í dag, men talan er um so mikið álvarsligan skaða, at Lars Olsen hevur valt at senda hann heim.
Fyribils er ongin komin í hansara stað. Lars Olsen úttók 24 spælarar til hópin, men pláss er bara fyri 23. Tí skuldi ein sorterast frá alíkavæl.
Landsdysturin millum Føroyar og Norðurírland verður í annaðkvøld klokkan 19.45 á Tórsvølli.
