4-1 er ein skeiv mynd av dystinum, hóast eg ásanni, at tað er uppiborið, at Írland vinnur. Og enn eina ferð spæla vit ein góðan fyrra hálvleik og spæla fult upp við eitt av teimum frægaru liðunum í Europa, segði Lars Olsen eftir dystin í kvøld.
Tíverri byrjaðu vit seinna hálvleik illa og komu skjótt afturum 0-2. Vit fáa eitt mál, men tíverri fáa vit ikki javnað út, og tá teir koma upp á 3-1, so er útselt hjá okkum.
Hetta var triði HM-undankappingardysturin hjá Lars Olsen sum landsliðsvenjari hjá Føroyum, og hann ásannar, at uppgávan til komandi dystir verður tann sama, sum hon hevur verið, at fáa talið á mistøkum niður.
Liðið er fyri tað mesta væl skipað, so vit skulu arbeiða meira við tí, vit gera, tá vit sjálvir hava bóltin, umframt at vit skulu gera færri feilir, tí tað eru teir, vit tapa dystirnar uppá.
