Nógv mál vórðu skorað í hesum umfarinum í landskappingini. Fyrstu dystirnir vóru sunnudagin, og tá ið umfarið var liðugt í gjárkvøldið, var samlaða máltalið 25 ella 5,0 í miðal fyri hvønn av teimum fimm dystunum.
Størsta málrokið var í Streymnesi, har væl upplagda heimaliðið vann 8-0 á illa sperda B71. Tað var ikki óvæntað, at EB/Streymur vann á sandoyingum, men tað var óvæntað, at talan skuldi gerast um sovorðið skrædl, tí B71 hevði jú megnað 2-1 í Gundadali ólavsøkudag ímóti HB.
Hetta var bara triðja ferðin í ár, at talan var um úrslit, har málmunurin var fimm mál ella meiri enn tað. Fyrsta ferðin var í fyrsta umfari, tá ið B68 vann 5-0 á heimavølli ímóti B71. Hetta var 1. apríl, og 27. juni var tað púra óvæntað, at B36 skuldi vinna 5-0 í Fuglafirði. Hetta var aftaná, at ÍF hevði vunnið 4-2 á heimavølli ímóti B68 og 2-0 á Sandi. Tað vísir seg ofta, at sovorðin skelkandi stórtap lúra, tá ið tað annars frammanundan hevur hilnast væl.
8-0 EB/Streyma sigurin á B71 er tann størsti í bestu fótbóltsdeildini í fimm ár. Í 2005 vann HB tveir stórsigrar á ÍF í Gundadali – 6-0 11. mai og so 9-0 10. juli. Síðani tá og inntil síðsta sunnudag var einki úrslit, har munurin var meiri enn sjey mál.
Frá fyrsta umfari í 2005 og inntil í dag hevur málmunurin í 24 av 531 dystum verið størri enn fýra mál. HB og EB/Streymur hava vunnið seks ferðir í part við so stórum málmuni, KÍ hevur vunnið tríggjar so stórar sigrar hesi árini, B36 og B68 hava vunnið tveir stórsigrar, og Víkingur, GÍ, NSÍ, Skála og ÍF hava vunnið ein stórsigur í part síðani 2005.
Nú er langt síðani, at talan hevur verið um sigrar við tvey sifraðum tølum. Tað er ikki komið fyri, síðani B36 á heimavølli í 2001 vann 15-0 ímóti FSV. Vágaliðið flutti niður, og B36 vann FM.
