Tað er greitt, eftir at Almanna- og mentamálaráðið hevur sent uppskot til hoyringar um nýggja lóg um miðlastuðul.
Undir síðstu samgongu varð eisini pilkað við lógina, sum gjørdist nógv verri og sera trupul at umsita. Landsstýrismaðurin tá, Jenis av Rana, vildi broyta lógina eftir egnum høvdi, hóast mótmæli og frámæli. Úrslitið gjørdist ein hurluvasi, sum allir partar nú royna at sleppa burtur úr.
So kundu vit hildið, at hetta landsstýrið fór at bøta skaðan. Jú, játtaðir eru fleiri pengar, tað er ein ítøkiligur bati. Men fólk í samgonguni vilja ikki hava verandi miðlar. Tey vilja hava nýggjar miðlar við øðrum fólkum og øðrum eigarum – helst eisini við 'betri og rættari' meiningum. Tí ætla tey at brúka 10 milliónir almennar krónur at stuðla einum nýggjum fjølmiðli í fimm ár. Hesir pengar skulu brúkast til at kappast við verandi miðlar, ið frammanundan liggja lágt.
Hendan ætlan sigst byggja á ein dreym hjá fyrrverandi kringvarpsfólki í Tjóðveldi, sum droyma um at stovna eitt nýtt alment kringvarp – »eina lítlasystir hjá Kringvarpinum«, sum onkur hevur málborið seg. Ein ætlan, sum hevði kostað nógvar tíggjutals milliónir um árið.
Privatu miðlarnir hava tað sum er trupult við at kappast við fleiri almennar stovnar, sum eisini royna at tjena pengar á lýsingarmarknaðinum, sum nátúrliga lá hjá bløðunum, ið hava verið til seinastu 150 árini. Harumframt kappast privatu miðlarnir við teir amerikonsku sosialu miðlarnir, sum landið og almennir stovnar eisini brúka nógv, heldur enn at brúka tænastur hjá føroyskum miðlum, sum gjalda skatt, lønir, mvg og keypa tænastur í føroyska samfelagnum.
Vit kunnu bara vóna, at onkur fær hesi tjóðveldisfólkini upp á aðrar tankar, áðrenn hetta verður borið í Løgtingið. Uppgávan hjá politikarum er at skapa fortreytir hjá vinnuni. Skapa góðar og tryggar karmar um vinnuna. Uppgávan er ikki blanda seg uppí, at bestemma innihald, at døma um innihald, ella at gera av, hvør skal sleppa at hava ein fjølmiðil. Tað dugir vinnan sjálv nógv betri enn politikararnir, sum skulu halda fingrarnar langt burtur frá slíkum. Fyri tað um fyrrverandi kringvarpsfólkini í Tjóðveldi ikki skilja hetta, so vóna vit, at løgmaður er so frægur, at hesin ørskapurin steðgar.
Tað er kortini órógvandi og lítið álitisvekjandi, at eitt slíkt kappingaravlagandi uppskot kemur úr Tinganesi, tí so hava topparnir í samgonguni góðkent tað.
