Millum annað hesir spurningarnir verða svaraðir, tá ið nevndin, sum løgmaður setti at skriva álit um samsýning og eftirløn landsstýrismanna í morgin klokkan 9 fer at almannakunngera álitið á framløgu á løgmansskrivstovuni.
Sosialurin hevur fleiri ferðir reist spurningin, um tað er rímuligt, at politikarar fáa upp í 13-14.000 krónur um mánaðin skattafrítt at ferðast fyri, tá onnur fólk hava heilt aðrar treytir.
Hvørja ferð kjakið kemur upp, so lova politikarar at kanna málið.
Súsanna Danielsen, stjóri á løgtingsskrivstovuni, gjørdi í morgin hesa viðmerking undir greinini um málið á Portalinum:
»Hetta man vera 4. álitið, sum verður handað løgmanni hesum viðvíkjandi. Guð viti, um hetta fer at føra nakra broyting við sær.«
Okkurt bendir soleiðis á, at tey á Løgtingsskrivstovuni ikki trúgva serliga nógv upp á slík álit.
Men løgmaður hevur lovað at gera nakað við málið. Hann hevur sagt við Miðlahúsið, at hann heldur, at ferðaendurgjaldið skal lækka, at lønin ikki er ov høg, og at landsstýrisfólk áttu at fingið ráðharrabilar.
Í morgin síggja vit, hvussu leikur fer.
