Tað hevur verið gitt dúgliga, hvør verður landsstýrisfólk við heilsumálum. Bæði Dimmalætting og Sosialurin gittu í gjár, at tað verður antin Aksel Johannesen ella Eyðgunn Samuelsen. Harumframt var Katrin Dahl Jakobsen nevnd sum eitt gott boð í Sosialinum.
Aksel Johannesen sigur í morgun, at hann ikki væntar, at tað verður hann sjálvur. Og Eyðgunn Samuelsen vil ikki siga nakað sum helst.
Jóannes Eidesgaard, formaður Javnaðarfloksins, vil ikki siga nakað í morgun.
- Tit gittu í gjár, og tað kunnu tit bara halda fram at gera, sigur Jóannes Eidesgaard.
Hann greiðir tó frá, at klokkan 16 í dag fer Javnaðarflokkurin á fund um málið, eftir at tey vóru komin rættiliga langt í gjár.
- Tað eru enn nøkur ting, ið skulu fáast upp á pláss, men tað verður seint í kvøld, ella tíðliga í morgin, at eg fari at boða løgmanni frá, hvønn flokkurin peikar á, staðfestir hann.
Formaðurin sigur onki
Jóannes Eidesgaard er annars púra kúrrur í morgun.
Er nakað hald í gitingunum hjá bløðunum í gjár?
- Tit halda bara fram at gita.
Dimma hevði ein topp 10 lista yvir, sum hevði tey 10 við mest atkvøðum. Verður hesin nýttur?
- Tað sigi eg onki um.
Kanst tú siga, um tað verður ein í tingmanningini ella onkur annar?
- Nei.
Kanst tú so siga, hvat kyn tað verður?
- Nei. Tað kann eg heldur ikki, staðfestir Jóannes Eidesgaard.
Hetta vil tí siga, at tað ikki verður fyrr enn seint í kvøld ella tíðliga í morgin, at nýtt landsstýrisfólk verður valt, sum Kaj Leo Johannesen, løgmaður, síðan setir í starv. Viðkomandi, ið verður valdur sleppur í øllum førum í ein heitan sess at umsita nógvan pening.
