Føroysku landsliðsmálverjarnir, Rakul Wardum og Annika Fríðheim Petersen avrikaðu væl fyri síni lið í dag undan EM-undankappingardystunum móti Svøríki á útivølli komandi hósdag klokkan 17.30, og móti Íslandi í høllini á Hálsi í Havn komandi sunnudag klokkan 15.
Rakul og liðfelagarnir í Ringkøbing spældu javnleik 33-33 móti Horsens á heimavølli í dysti í bestu donsku hondbóltsdeildini. Í steðginum var Horsens á odda 18-14.
Heilt móti dystarenda var tað sera týðandi, at Rakul við støðuna 33-32 bjargaði einum skoti hjá Kristin Thorleifsdóttir. Lítla løtu seinni lá bólturin í málinum hjá Horsens, og so hevði RIngkøbing bjargað sær eitt stig.
Rakul hevði í dag eitt bjargingarprosent í málinum, ið var 32 prosent.
Ringkøbing er næstaftast í deildini við fýra stigum.
Annika Fríðheim Petersen og liðfelagarnir í Follo taptu í dag á heimavølli 25-28 fyri Fredrikstad í dysti í bestu norsku hondbóltsdeildini. Í steðginum var Fredrikstad á odda 15-14.
Bjargingarprosentið hjá Anniku í dag var 33 prosent.
Follo er aftast í deildini við tveimum stigum.
Tað verður hart brúk fyri góðum avrikum hjá Rakul og Anniku í komandi viku, kanska serliga í heimadystinum móti Íslandi.
