Aimé Jacobsen, borgarstjór í Sørvágs kommunu, heitir nú á landsmyndugleikarnar at taka ábyrgd fyri samferðsluviðurskiftunum í Mykines. Tað ger hon í lesarabrævi nú løgtingið hevur aðalorðaskifti um ferðavinnuna.
Borgarstjórin vísir á, at ferðavinnan hevur vundið upp á seg síðstu árini, og at tað merkist millum annað serliga væl í Mykinesi. Men vøksturin hevur eisini við sær nakrar avbjóðingar, ið millum annað krevja, at myndugleikarnir sýna ábyrgd og forða fyri møguligum vandastøðum. Og tað er har, at borgarstjórin metir, at landið má taka um endan og skipa tryggar umstøður í Mykinesi.
- Sørvágs kommuna hevur áður víst á, at tað er av alstórum týdningi at havnaviðurskiftini í Mykinesi gerast tryggari, skrivar borgarstjórin og leggur afturat.
- Atløgusíðan ella ferjulegan í oynni er als ikki egnað og nóg trygg til risastóra ferðafólkatalið. Fólk standa sum sild í tunnu á lendingini, og kemur eitt óløgi, so er vandi á ferð. Tað verður tí neyðugt sum skjótast at bøta um hetta við m.a. longdum bryggjukanti og girðing fram við bryggjukantinum, tí Føroyar verða ikki eitt stuttligari land at búgva í, um illa vil til.
- Gøtan frá lendingini og niðan í bygdina, nevnd Fjørdalsgøta, var fyri kortum asfalterað. Tað vísir seg, at hon ber ikki stóru mannfjøldina. Stór riva er komin í, tí fóturin niðri í helluni í gjónni gevur seg undan soleiðis, at vandi er fyri, at har rapar. Føroyar verða ikki eitt stuttligari land at búgva í, um illa vil til.
Borgarstjórin vísir víðari á, at tey eru av tí sannføring í kommununi, at tað er landsuppgáva at tryggja havnaviðurskiftini á oynni.
- Sørvágs kommuna metir tað vera eina landsuppgávu at tryggja havnaviðurskiftini í Mykinesi og hevur í skrivi í dag aftur heitt á landstýrismannin í samferðslumálum at fáa fígging til vega til ferjuleguna og bakkaverjuna í Mykinesi.
- Í sáttmálanum frá 2005 um samanlegging av Mykinesar kommunu og Sørvágs kommunu stendur í innganginum, at bygdaráðini í Sørvági og Mykinesi staðfesta serstøðuna fyri Mykines sum útoyggj, og at samanleggingin fær ikki ávirkan á viðurskiftini millum landsmyndugleikarnar og Mykines sum útoyggj.
Til ber at lesa alt lesarabrævið hjá Aimé Jacobsen við at trýsta á her.
