Fiskivinna
Leirvíkstrolararnir høvdu sløk 300.000 pund tilsamans, nú teir løgdu veiðina upp í Saltangará síðstu nátt.
- Vit landaðu skipini í nátt, tí tey skuldu vera á Tórshavnar Skipasmiðju longu klokkan 07 í morgun, siga tey í Saltangará.
Sum skilst, skal okkurt gerast í sambandi við vatngerarnar umborð á skipunum.
Hvussu hendan vikan annars kemur at roynast á landingarmiðstøðini, var ikki heilt greitt, tá ið vit frættu í morgun.
Ísfiskatrolarin Edna, fyrrverandi Vesturvarði, sum Faroe Seafood eigur lut í, landar eini 150.000 pund í Saltangará í morgin, og á landingarmiðstøðini vænta tey eisini, at Rókur og Lerkur og Bakur og Stelkur koma inn at landa seinni í hesi vikuni.
- Vit vænta, at hesi fýra skipini koma inn at landa hósdagin ella fríggjadagin, siga tey á Beta.
