Nøkur hava ilskast inn á, at tað ikki hevur borið til at sæð spanskan fótbólt í donskum sjónvarpi hetta kappingarárið, men hetta verður nú broytt, soleiðis at fólk her um leiðir nú aftur kunnu sleppa at síggja La Liga.
Tað er TV2, sum í dag boðar frá, at tey í næstum fara at senda frá sponsku La Liga og italsku Seriu A á rásini TV2 Sport. Tað er eitt samstarv við stroymingstænastuna, Strive, ið ger hetta møguligt.
TV2 fer at vísa ein dyst úr annaðhvørt La Liga ella Seriu A um vikuna. Fyrsti dysturin verður vístur vikuskiftið 2.-3. februar. Samstarvsavtalan við Strive er galdandi í tvey og eitt hálvt ár.
Danska sjónvarpsstøðin boðar eisini frá, at kundar á TV2 Play um fáar mánaðir fáa møguleikan at keypa sær Strive-hald við avsláttri, og harvið fáa atgongd til allar dystir í La Liga og Seriu A.
