Mánadagin varð kunnandi fundur hildin fyri løgtingslimum um álit um yrkisskeið. Talan er um eitt uppskot, sum mælir til víðfevnd eftirútbúgvingartilboð fyri øll, sum hava tilknýti til arbeiðsmarknaðin, antin um tey eru í arbeiði, men eisini um tey eru arbeiðsleys.
? Grundtankin er tann, at tú gongur í skúla alt lívið, og tú eigur at kunna halda áfram við at útbúgva teg, meðan tú ert á arbeiðsmarknaðinum. Hetta fer at geva møguleika til fólk á til dømis flakavirkjum at fáa prógv uppá tað, sum tey longu hava lært, sigur Høgni Hoydal, landsstýrismaður í skúlamálum.
Ein arbeiðsbólkur hevur síðani í oktober mánaði í fjør havt fundir, og í mars mánaði varð álitið handað landsstýrismanninum.
? Ein nevnd uppá 13 fólk hevur sitið og arbeitt við álitinum, og sum nakað heilt serligt, vartað ein samd nevnd, sum legði álitið fram. Tað er vinnan sjálv, sum hevur ynskt hetta, og tað verður eisini vinnan sjálv, sum kemur at standa fyri meginpartin av fíggingini, sigur Høgni Hoydal.
Lívslang læra
Alfred Petersen, sakførari, er formaður í nevndini, sum hevur arbeitt við álitinum. Hann greiðir soleiðis frá arbeiðsgongdini:
? Vit býttu okkum upp í fýra bólkar, har vit arbeiddu vit ymiskum uppgávum hvør, og síðani savnaðu alt saman í eina heild. Tað er serliga kostnaðurin, sum er áhugaverdur, tí um ein arbeiðsgevari verður biðin um at halda eitt skeið, so skal hann gera tað og eisini gjalda fyri tað.
Nevndin kallar hesar møguleikarnar fyri lívslanga læru. Vinnan mennist alsamt og starvsfólkini eiga tí eisini at mennast við henni.
? At ganga í skúla er ikki avmarkað til frá tí tú ert 7 til tú ert til dømis 20. Skúli er nakað, tú hevur brúk fyri alt lívið. Okkara mál er millum annað at geva virkisføra til øll, eisini arbeiðsleys og vinnutarnað, umframt at tað fer at gera eina lønsama og meira kappingarføra vinnu, sigur Hans Andrias Dam Joensen frá Mentamálaráðnum.
Lagt verður upp til brúka verandi umstøður, sum longu eru í landinum. Tað verið seg skúlar og lærarar, og harafturat verður tosað um, at fólk, sum leingi hava arbeitt í vinnuni, kunnu brúkast sum lærarar.
Eisini verður lagt upp til fjarundirvísing frá teimum smærru plássunum í Føroyum, og at brúka skúlar í útjaðarinum, so alt ikki kemur at vera á meginlandinum.
Álitið er somuleiðis eisini eitt lógaruppskot, sum verður lagt fram á tingi beint eftir ólavsøku, og er Høgni Hoydal sannførdur um, at uppskotið fer at verða væl móttikið.
? Hetta er eitt lógaruppskot, sum ikki fer at geva Landskassanum tær stóru útreiðslurnar, tí tað eru arbeiðsplássini, sum skulu gjalda, og á kunningarfundinum í dag, tóku løgtingslimirnir væl ímóti hesum, sigur Høgni Hoydal, sum tó leggur afturat, at tað var so sum so við uppmøting.
Í og við at fólk fáa møguleika til yrkisskeið, verða yrkisskeiðini góðkend av almennu myndugleikunum, og kunnu tey tí eisini verða nýtt til prógv uttanlands.
Høgni Hoydal metir tað verða av stórum týdningi, at fáa hetta uppskotið ígjøgnum so skjótt sum gjørligt, og tí verður tað lagt fram á tingi fyrst í komandi tingsetu.
