Fiskifloti
Á framløgufundinum, sum grannskoðarafelagið Rasmussen & Weihe skipaðu fyri í síðstu viku, fingu vit eisini eina talvu, sum sýnir samlaðu ársverkini í føroyska fiskiskipaflotanum.
Eins og øll hini árini, síðan felagið fór undir sína greining, eru tað línuskipini, sum hava tey flestu ársverkini. Hetta kemst í fyrsta lagi av, at skipini eru so nógv í tali, og haraftrat kemur, at manningartalið er so stórt. Flestu línuskip hava 14 mans við hvønn túrin.
Taka vit ársverkini í føroyska fiskiskipaflotanum sum heild síðan ár 2002, vuksu hesi árini 2002-2003, men øll árini síðan eru tey vorðin færri í tali.
Samlaða talið av ársverkum í 2002 var 1.151, og árið eftir var talið 1.190 – ella 39 fleiri. Síðan hevur talið verið minkandi, til ársverkini í 2006 vóru 1.052 í tali, sum er 99 færri.
Árini 2005-2006 gjørdust ársverkini 3,2% færri.
Tilsamans 327 ársverk vóru í línuskipaflotanum í 2006, og á øðrum plássi komu ársverkini umborð á partrolarunum, sum vóru 141 í tali.
Á triðja plássi komu verksmiðjutrolararnir við 130 og á fjórða plássi ársverkini umborð á tí, sum í greiningini verður rópt ”onnur skip, við 129 ársverkum.
Flestu av teimum 129 ársverkunum við øðrum skipum, eru burtur, tí uppi í hesum var manningin umborð á Atlantic Navigator, sum ikki er longur í føroyska fiskiskipaflotanum.
Teir skipabólkar, sum stóðu seg best í 2006, vóru pelagisku skipini og verksmiðjutrolararnir. Hesir høvdu ávikavist 111 og 130 ársverk í 2006.
