BROT
Seinastu tíðina hevur Fiskiveiðieftirlitið verið runt landið og hevur kannað eftir veiði av ungfiski. Hesar kanningar hava fyribils ført við sær, at eitt størri línuskip hevur mist fiskiloyvi í 14 dagar. Eftirlitsfólkini hjá Fiskiveiðieftirlitinum staðfestu nevniliga, at heili 43% av toskinum í lastini var ungfiskur, sum er fiskur minni enn 50 cm.
At eitt skip soleiðis missir fiskiloyvi í 14 dagar, merkir, at skipið slett ikki sleppur til fiskiskap í hesum tíðarskeiði – heldur ikki til Íslands, um kvota er eftir har yviri.
Á Fiskiveiðieftirlitinum vil Jóhan Simonsen, fulltrúi, kortini ikki siga, hvat línuskip talan er um, tí skipið hevur ein kærumøguleika.
Fulltrúin vísir á, at áður hava onkrir útróðrarbátar mist fiskiloyvi fyri at hava havt ov nógvan ungfisk, men honum kunnugt er hetta fyrstu ferð, at eitt størri línuskip hevur mist fiskiloyvi av hesi orsøk.
Jóhan Simonsen sigur, at tað serliga er í ár, nú nógvur smátoskur er at fáa, at trupulleikar hava verið við íblanding av smáfiski.
- Ynskiligt hevði verið, at vit høvdu havt gjørt enn fleiri kanningar, men hesar fara at halda fram, leggur hann aftrat.
Fulltrúin sigur, at tað serliga er húkaveiðan, sum hevur verið ein trupulleiki í hesum árinum.
- Tað er nógvur smáfiskur at fáa, og um skip og bátar ikki ansa eftir, hvar teir seta sínar línur, kann prosentparturin av smáfiski skjótt gerast ov stórur.
Jóhan Simonsen sigur, at heilt síðan 1993 hevur verið galdandi, at boðast skal frá, um ov nógvur ungfiskur er uppi í veiðini.
- Henda fráboðanarskylda hevur sum heild virkað væl við partrolarunum, tá talan hevur verið um smáan upsa, men tað vísir seg, at útróðrarbátar og línuskip ikki hava verið líka skjót at boða frá, sigur hann.
Upsin er ikki smáur, sum hann var fyri nøkrum árum síðan, og tí eru trupulleikarnir ikki so stórir her í løtuni.
- Men útróðrarbátar og línuskip hava somu fráboðanarskyldu sum partrolarar, tá ov nógvur smáfiskur er uppi í veiðini. Hesi før skulu boða frá eftir hvørja setu, um trupulleikar eru.
Jóhan Simonsen sigur, at markið fyri, hvussu nógvur ungfiskur kann verða uppi í veiðini, er 30%, men støddarmátini eru ymisk – alt eftir, hvørji fiskasløg talan er um.
Fulltrúin vísir á, at tað ikki er óhugsandi, at Fiskiveiðieftirlitið fer at steingja ávísar leiðir fyri veiði, og eftirlitið kann steingja leiðir heilt í land, um hildið verður, at tað er neyðugt til tess at verja ungfisk.
- Vit stongdu soleiðis herfyri eina leið eystur úr Svínoynni, sum gekk mest sum heilt inn klettin á Skorini, leggur hann aftrat.
At enda sigur Jóhan Simonsen, at kemur Fiskiveiðieftirlitið fram á veiði, sum hevur nógvan smáfisk, kann hetta gerast kostnaðarmikið fyri fiskiførini.
- Í flestu førum kann talan gerast um brot á fráboðanarskylduna, og tí vil eg mæla útróðrarbátum og línubátum til at halda galdandi reglur, sigur Jóhan Simonsen.
