Hesa vikuna hava trý størri skip landað í Sørvági, eitt garnaskip og tvey línuskip. Herfyri løgdu eisini nógvir útróðrarbátar veiðina upp í Sørvági. Venus landar 55.000 pund av línufiski í Sørvági í dag, og í gjár var línuskipið Havbúgvin inni við 70.000 pundum, sum teir hava fingið vestanfyri.
Sagt verður úr Sørvági, at veiðan hjá línubátunum er blandað við toski, longu og øðrum fiskasløgum.
Mikudagin landaði eisini garnaskipið Drelnes í Sørvági. Teir høvdu 22.000 pund av havtasku.
Í løtuni er streymurin harður, og væntandi loysa línuskipini aftur mánadagin.
Herfyri avreiddu fleiri útróðrarbátar í Sørvági, men í seinastuni hevur ikki viðrað nakað serligt, og tí hevur eingin útróður verið.
Á Landingarmiðstøðini í Sørvági siga tey, at flestu útróðrarbátar hava roynt við snellu, men nú hava nakrir lagt um til línu.
- Tað eru ikki bara bátar úr Sørvági, sum landa her hjá okkum, men bátar úr at kalla øllum landinum, siga tey á Landingarmiðstøðini í Sørvági.
