Tað var ikki gjørligt at fáa viðmerkingar frá Lønardeildini til nevndu grein, áðrenn hósdagsblaðið fór til prentingar. Men eftir, at blaðið var prentað, ringdi Olavus Jespersen til okkara, so ein viðmerking kundi fáast frá Lønardeildini.
Olavus Jespersen sigur, at Lønardeildin hevði kannað, hvussu vanlig mannagongd var, tá vaskifólk varð sett í starv hjá Toll- og Skattstovuni.
Tey fingu greitt at vita, at goldin varð vanlig tímaløn umframt fimm krónur, tí arbeitt verður vanliga um kvøldið. Tá gjørt verður høvuðsreint, verða goldnar sjey krónur eyka um tíman, sigur Olavus Jespersen. Hetta er tað, Landsstýrið, og seinni Fíggjarmálastýrið, hevur góðkent og praktiserað, sigur Olavus Jespersen.
Hann sigur, at Lønardeildin kann ikki gjalda nakra eftirløn til vaskifólk á Toll- og Skattstovuni sambært sáttmála av teirri einfaldu orsøk, at eingin sáttmáli er millum Lønardeildina og Føroya Arbeiðarafelag um hesi fólkini.
