Íslandskvotan hjá snelluskipunum er minkað so nógv seinnu árini, at tey fáa bara soleiðis hálvanannan túr í part. Og tað er so lítið, at tað loysir seg illa at fara eftir tí, tí tey fáa mest upsa, sum er bíligur fiskur. Fleiri teirra hava tí ár undan ári selt kvotuna til línuskipini.
Eitt fyri og annað eftir hava snelluskipini selt loyvini, og líka ofta eru tað línuskip, sum keypt hava og harvið flutt snelluveiðuna yvir á línuna.
Dømini um, hvussu gongdin hevur verið, eru fleiri. Eitt er Hoyvíkingur, sum fekk snelluloyvið hjá Polli. Hoyvíkingur hevur seinnu nógvu árini bara roynt við línu.
Morning Star, sum í áravís bara hevur roynt við snellu, varð í fjør seld reiðaríðnum hjá Thomasi Nygaard, og loyvið flutt til hansara, sum bara roynir við línu. Útgerðin varð tikin úr Morning Star, og skipið varð síðan søkt eystan fyri Suðuroynna.
Havbúgvin var herfyri seldur reiðarínum West Line í Miðvági, og Íslandsloyvið flutt yvir á West Freezer, sum roynir við línu. Havbúgvin varð lagdur við bryggju í Miðvági, og útgerðin tikin úr.
Men eisini í øðrum førum hava snelluloyvini undir Íslandi beinleiðis verið havd til spekulatión.
Í fyrru helvt av nítiárunum varð snelluskipið Mazeppa selt út Fuglafirði til Viðareiðis og fekk navnið Gáshøvdi. Nýggju eigararnir riggaðu skipið um og hava síðan trolað undir Føroyum við tí. Eingin snellutúrur yvirhøvur er gjørdur til Íslands. Men snelluloyvið, sum fylgdi við skipinum, hava eigararnir havt og selt øðrum, sum so hava brúkt tað undir Íslandi, meðan Gáshøvdi hevur trolað undir Føroyum.
Sosialurin hevur fingið innlit í søluna av hesum fiskiloyvum síðan 1998. Og hon vísir týðuliga, hvussu gongdin hevur verið. Fyrstu árini var okkurt snelluskip framvið at keypa, men síðan yvirtóku línuskipini, sum kunnu bjóða hægri prís.
Í 1997 varð Íslandsloyvið, sum Gáshøvdi hevði fingið, selt snelluskipunum Norðsøka og Ægiri.
Í 1998, varð tað býtt í trý til Kúrberg, Klakk og Kvikk. Nú eru línuskipini komin uppí.
Í ár 2000 varð alt loyvið selt Grunningi. Í 2001 varð tað selt Skørini.
í 2002 verður loyvið endaliga avhendað einum felag í Klaksvík, sum eigur tvey skip, Jákup B og Líðhamar. Treytað er tó frá Fiskimálaráðnum, at keyparin skal boðað frá, hvat av skipunum skal hava Íslandsloyvið hjá Gáshøvda. Keyparin boðar frá, at loyvið skal flytast endaliga yvir á Jákup B.
Sostatt er hetta Íslandsloyvið, sum eitt snelluskip, ið kom til landið í 1986, fekk, farið umvegis ein trolbát, sum ongantíð brúkti tað, til eitt línuskip, sum nú hevur eitt eyka íslandsloyvi.
Reiðaríðið hjá Gáshøvda hevur lagt gamla Gáshøvda og bygt ein nýggja trolara í íslandi. Men hann kann ikki fáa Íslandsloyvi hjá gamla skipinum, tí tað skipið hevur ikki sjálvt fiskað tey 60% av kvotuni, sum nú er treyt fyri at fáa Íslandsloyvi. Loyvið hjá gamla Gáshøvda er tí endaliga avhendað reiðarínum hjá línuskipinum Jákupi B.
