Kappingin hjá 6-mannaførum við kvinnum hevur higartil ikki verið serliga spennandi. Jarnbardur tykist vera ógjørligur hjá hinum bátunum at taka, og leygardagin vunnu tær aftur. Hesuferð var kappingin frá hinum bátunum tó harðari enn vant. Undir miðróðrinum vann Páll Fangi, sum er nr 2 í FM-kappingini, seg nevniliga fram um Jarnbard, og var eina løtu oddabátur. Hetta var tó stokkut gleði, tí løtu seinni tóku Jarnbardakvinnurnar sær um reiggj, og vunnu seg framaftur. Páll Fangi og Gongurólvur tyktust verða teir bátarnir, sum fóru at fáa ávikavist silvur og bronsu. Nakað áðrenn endaspurtin loysti Jarnbardur frá hinum bátunum, og so mundu tey flestu halda, at tær aftur fóru at vinna í stórum stíli. Men Lóma kvinnurnar vildu tað øðrvísi. Nakað væl inni í miðróðrinum byrjaði Lómur at ganga væl, og tær blandaðu seg skjótt upp í kappingina. Beint áðrenn endaspurtin tóku tær bæði Gongurólv og Páll Fanga, og við einum øgiligum spurti vunnu tær seg enntá inn á Jarnbard. Hetta var tó ikki nóg mikið til at taka bláa bátin, men tey fimm stigini munnu óiva koma væl við hjá Lómakvinnunum, sum hingu fastar í startinum á Jóansøku, og tá ikki megnaðu meiri enn eitt fimta pláss. Við hesum hava tær víst, at tær enn kunnu vera við í kappingini, og nú eru bert 5 stig upp til næstbesta bátin, sum er Páll Fangi. So hóast sannlíkt er, at Jarnbardur verður meistari á komandi stevnu, so er enn kapping um silvurkrónurnar.
Eys
Myndatekstur: Lómur megnaði við einum øgiligum spurti at taka bæði Gongurólv og Páll Fanga, og at vinna seg inn á Jarnbard, sum í miðróðrinum hevði loyst frá hinum bátunum.
