Lars Løkke Rasmussen, sum eftir øllum at døma noyðist úr forsætismálaráðnum um nakrar dagar, ætlar sær at halda fram sum formaður í Vinstra og at leiða flokkin til næsta fólkatingsval.
-Eg haldi fram til næsta val og ætli mær at dystast aftur við Helle Thorning-Schmidt, um hon er formaður hjá sosialdemokratunum tá, sigur Lars Løkke Rasmussen við BT.
Lars Løkke Rasmussen tók við sum forsætisráðharri fyri tveimum árum síðani, tá Anders Fogh Rasmussen bleiv aðalskrivari í NATO. Á fólkatingsvalinum í síðstu viku hevði Vinstri framgongd og er størsti flokkur í Fólkatinginum. Sjálvur hevði Lars Løkke Rasmussen eitt sera gott val og fekk fleiri persónligar atkvøður enn nakað annað valevni.
