Vit í Miðlahúsinum kenna tað sum sigur fyri fólkaræðið, um kjakið, sum birtist í okkara miðlinum, nú førir til at hesi ódemokratisku serrættindi hjá politikarum verða avtikin.
Sjálvt løgmaður er nú komin upp á betri tankar og sigur seg nú vilja javnseta politikarar við fólk annars, tá tað kemur til pensjón og koyripengar.
Men hetta eru nýggir tónar.
Tá vit í Miðlahúsinum vildu hava løgmann at siga sína hugsan um hesi viðurskifti á sumri í 2010, helt hann einki um tiltøk sum at lækka lønirnar hjá tingfólki.
– At Føroya Løgting skal vera mannað við 33 tinglimum er alt ov nógv, segði hann. Stóð tað til hann, vóru 10 tingfólk færri.
– Álvaratos altso, er tað neyðugt at hava 33 tinglimir at stýra Føroyum, spurdi løgmaður.
Sjálvur helt hann, at eitt tingmannatal upp á 23 var hóskandi fyri eitt samfelag sum tað føroyska.
– Skulu vit tosa um at spara, vildi eg persónliga nógv heldur viðgjørt spurningin um at lækka tingmannatalið, enn eg eri sinnaður at viðgera spurningin um at lækka lønirnar, segði løgmaður.
Fyri fólkaræðið er tað ein sigur, um politikararnir nú – við løgmanni á odda – ganga í seg sjálvar og siga frá sær hesi korrumperandi framíhjárættindi, sum teir hava fingið sær. Gera teir ikki tað, missir fjøldin alt álit á politikarar og politisku skipanina.
