- Nú eiga kommunurnar tørn at lætta um hjá lágløntum. Tað sigur Kaj Leo Holm Johannesen.
Boðskapin sendir løgmaður út á Facebook, har millum annað skrivar soleiðis:
So gongur sjón fyri søgn tá skattauppgerðin kom heim í gjár. Kommunuskatturin, er nú størri enn landsskatturin, lægru inntøkurnar verða sera hart skattaðar í kommunuskattinum, og ikki í landsskattinum.
Í FB-kjaki eftir útmeldingina hjá løgmanni skrivar Rigmor Dam, løgtingskvinna fyri Javnaðarflokkin:
Tey framkomnu norðurlendsku vælferðarsamfeløguni brúka landsskattin til at útjavna ójavnan millum fólk. Tit brúka landsskattin til at økja um ójavnan.
Kaj Leo Holm Johannesen svarar:
Tað einasta eg royni at siga er at tey sum forvinna 200 tús + gjalda uml 90 % av øllum landsskattinum sum vit fáa inn. So nú eiga kommunurnar tørn at lætta meira um hjá lágløntum.
Rigmor Dam:
Og hvar skulu pengarnir til vælferðina so koma frá?? Tú sigur jú egentliga, at kommunurnar skulu spara starvsfólk og vælferð burtur. Skattur er og verður neyðugur, skulu vit hava dygdargóða vælferð - sum i sagens natur kostar.
Kaj Leo Holm Johannesen:
Meira láglønt hava eftir, størri er vælferðin hjá teimum, inntøkubýti millum land og kommunur er farið heilt av sporinum, tað veit eg sum fyrrverðandi kommunupolitikari í havn.
Lægsta kommunuskattaprosent er 16, meðan hægsta er 23,5%. Meðal kommunuskattaprosentið er 21,65.
