Kyndil vann sær munin

Fyrstu løtuna var tað annars H71, sum tóktist hava betra takið á dystin, og tá ið 10 minuttir vóru farnir vóru teir á odda 3-1. Síðani fekk kyndla­verjan betur fatur á hoy­víkingum, og hetta var eisini nakað, sum kom at merkja dystin. Kyndil fekk somu­leiðis gongd á álops­spælið og vunnu sær eina leiðslu í fyrra hálvleiki. Tá ið H71 hendingaferðina fekk spælt seg til møguleikar, var kyndlamálverjin, Mladen Mjerimacka, ein brandur at bjarga skotunum.
Starvsfelagi hansara í H71-málinum, Tóraldur Kollsker, stóð somuleiðis væl í fyrra hálv­leiki og var ein av høvuðs­atvoldunum til, at Kyndil ikki var á odda við nógv fleiri enn teimum trimum í hálv­leikssteðginum. 10-7 til Kyndil var nevniliga hálv­leiksstøðan.

Kyndil varðveitti
Ein útvísing til H71 tíðliga í seinna hálvleiki gjørdi sítt til, at Kyndil fekk flogið og skjótt kom á odda 13-8. Tóraldur Kollsker, sum annars stóð væl í fyrra hálvleiki, fekk ikki fatur á nógvum og so kom Ári Dam í H71-málið. Hann gjørdi nakrar avgerandi bjarg­ing­ar og H71 fekk mið­skeið­is í seinna hálvleiki minkað málmunin niður í tvey mál, men síðani dróg Kyndil aftur frá og avgjørdi dystin. Avgerandi var, at Bogdan Florea gjørdi tríggjar tekniskar villur í trimum álopum á rað og fekk eina út­skifting sum avrokning.
Verjan hjá Kyndli hevði ógvuliga gott tak á H71. Bogdan Florea gjørdi lítið um seg, meðan teir yngru heimligu leikararnir líkt­ust leikarum, ið høvdu skot­venjing fyri neyðini. Álops­spælið hjá Kyndli var eiheldur ser­liga einastandandi, men við leikarum sum Finni Hanssyni og Davidi Edvardsen eydnaðist tað teim­um at gera neyðugu fleiri málini enn hoyvíkingar, sum tókt­ust nakað moyrir eftir dystin tveir dagar framman­undan.
Kyndil vann hesa fyrstu hálvfinaluna uppiborið 21-17.

- - -

1. hálvfinala:

H71 - Kyndil 17-21 (7-10)
H71: Bogi G. Davidsen 3, Rúni Højgaard 3, Hans Kári Hansen 2, Høgni Olafsson 2, Esbern Patursson 2, Jónas Djurhuus 2, Bogdan Florea 1, Sigmundur Dahl 1, Sigmundur Nolsø
Kyndil: Finnur Hansson 6, David Edvardsen 5, Julian Johansen 3, Høgni Klein Olsen 2, Hörður Fannar SigÞórsson 2, Andrias Sólsker 1, Hans Áki Dal-Christiansen 1, Ludvík Súnason 1