Kyndil vann dramatiska grannauppgerð

Kyndil vann í dag 23-22 á Neistanum í FTZ-deildini í hondbólti. Menninir hjá Kyndil vóru annars á odda 23-14, tá 13 minuttir vóru eftir. Tað endaði við, at Kyndil akkurát kláraði at hála sigurin heim við einum máli.

Kyndilsmenn deildu málini væl millum sín. Bjarni Sørensen var toppskjútti við seks málum, meðan hini málini vóru deild millum átta málskjúttar. Fyri Neistan var Rói Berg Hansen ein einmansherur og skoraði níggju mál.

Í Vestmanna greiddi VÍF sín setning og vann 34-25 á botnliðnum Team Klaksvík. Tríggir mans skoraðu sjey mál fyri VÍF. Teir eru Filip Jojic, Julian Olsen og Hanus Christophersen. Toppskjútti í øllum dystinum var tó Bogdan Florea úr Team Klaksvík.

Kyndil hevur við sigrinum meldað seg inn í FM-finalustríðið aftur, meðan VÍF við sínum sigri hevur økt frástøðuna niður til KÍF og triðja plássið við tveimum stigum.

FTZ-deildin:

Neistin – Kyndil 22-23

VÍF – Team Klaksvík 34-25