Julian Johansen boðaði mánadagin alment frá, at hann gevst sum venjari hjá besta mansliðnum hjá Kyndli, eftir hetta kappingarárið. Hann ynskir ein steðg frá hondbóltsvenjing og heldur, at trý ár í sama felagið við somu manning er nokk – hóast liðið júst hevur vunnið steypakappingina.
Kyndil hevði Martin Lellek á vitjan til steypafinalurnar. 28 ára gamli Martin Lellek mátti sum ungur gevast at spæla hondbólt, tá hann meiðslaði sær knæið. Forkvinnan í Kyndli, Maibritt Johannesen, váttar at Kyndil er í samráðinum við Martin Lellek.
-Hann hevur hugt eftir umstøður og tosa við okkum. Vit samráðast í løtuni um ymiskt ting, ið skulu upp á pláss. Hann skal jú eisini flyta til Føroyar um tað er. Tú veist ongantíð ordliliga í slíkum støðu, men vit vita gjarna innan tvær vikur um tað verður hann ella ikki, sigur Maibritt Johannesen við Sosialin.
