Tað var, sum tað átti at vera, tá ið Kyndil og H71 løgdu upp til eina spennandi seinnu hálvfinalu í steypakappingini sunnukvøldið, eftir at Kyndil við 21-17-sigri tveir dagar frammanundan hevði tryggjað sær ein lítlan fyrimun. Hondbóltsglaðir fjepparar tvíbýttu eina stúgvandi fulla høll – onnur helvtin í grønum og hin í svørtum – meðan mælsku fjeppararnir við felagsrópum kyndu júst rætta hýrin til ein slíkan dyst, eitt slíkt tiltak.
Ein hugsaði, at við hesum umstøðunum var trupult hjá leikarunum at mátast við vónirnar hjá teimum, ið hugdu at, men um nakar ivaðist, so ivaðist viðkomandi ikki leingi. Næsti tímin av hondbólti var eitt brak!
Kyndil, so H71
Tað var Kyndil, sum bæði hevði munin á samlaðu máltalvuni og nú eisini fyrimunin á heimavølli, og tað sýntust teir grønu úr Havnini vilja staðfesta alt fyri eitt. Beinharða verjuspælið, sum fór til markið, men ikki yvirum markið, og sum eydnaðist so væl í fyrru hálvfinaluni, varð uppafturtikið. Væl vaksnu bakkspælararnir, sum hava fingið risan, Hörður Fannar SigÞórsson, ímillum seg í verjupartinum, skaptu ein flytandi múr, ið trupul var at koma upp- og rundanum.
Hetta var eitt av grundarsteinunum undir sigrinum og serliga fyrstu løtuna, tá ið Kyndil hevði einarætt upp á leiðsluna – men einans til níggju minuttir vóru eftir, tá ið H71 javnaði til 8-8 og síðani av álvara fekk vind í seglini ímóti hálvleiksenda. Bogdan Florea, sum ikki fekk stórt rásarúm, trein úr skugganum og langaði nakrar bóltar í meskarnar, somuleiðis sum ungu og kviku heimligu uppaldu H71-leikarunum sneiddu seg inn um stinnu kyndlaverjuna og við fleiri málum fingu vent myndina á høvdið. Hesa løtuna átti H71 eina og aleina, og við ótrúligum hýri á hoyvíksfjøldini tóktust teir ikki at vera til at steðga og Kyndil fekk ein kærkomnan hálvleik.
Hálvleiksstøðan var 14-10 til H71, og í samlaðu støðuni stóð á púra jøvnum.
Skiftu um leiðsluna
Tann løtan, sum var so góð fyri H71 undan hálvleikssteðginum, hevði gjørt teimum gott. Teir spældu nevniliga framvegis væl fyrstu løtuna í seinna hálvleiki og vóru skjótt á odda 17-12, sum var ein leiðsla á neyðugu fimm málini, sum hevði sent teir í finaluna.
Ilt gjørdist verri hjá Kyndli, sum eina løtu hevði tríggjar mans útvístar og vóru av álvara sárbarir. Hesa løtuna kundu teir missa finaluplássið. H71 kendi tó ikki sína vitjunartíð, og heldur enn at økja um leiðsluna, fingu teir eisini tveir mans útvístar og endaðu sjálvir við at spæla í undirtali. Hesa løtuna væntaði helst eitt sindur av royndum hjá unga hoyvíksliðnum.
Finnur Hansson var ein brandur í álopspartinum hjá Kyndli, har hann við sínum eyðkendu, snildu spælingum gjørdi seg galdandi, men so sanniliga eisini við at sjálvur skjóta nógv ótrúliga umráðandi mál við síni ótrúligu samanseting av lopmegi, skotstyrki og beinrakni. Málini fullu júst røttu tíðina, og høvdu við sær, at Kyndil fekk neyðuga andarrúmið.
Undirhaldandi endi
Tá ið tað írestaði ein minuttur var støðan 26-23 til H71 og H71 slapp í álop. Mong mundu halda, at nú var skilabest at dríggja tíðina eitt sindur og fáa avgerandi málið, sum kundi sent H71 í steypafinaluna, men heldur óskiljandi valdi Bogdan Florea at leggja alla orku í at avgera álopið alt fyri eitt og royna at finna Sigmund Nolsø á strikuni. Hetta miseydnaðist, Kyndil vann bóltin og slapp í álop at eta tað sindrið av sekundum, sum vóru eftir av hesi frálíku seinnu hálvfinaluni, sum eingin vildi hava at enda. Kyndil tapti 24-26 henda dystin, men líka løgdu teir í, tí við samlaðum 45-43-sigri kundu teir á kyndilsmessu frøðast um, at teir fyri 18. ferð í 30 ár eru í steypafinaluni.
- - -
2. hálvfinala:
Kyndil - H71 24-26 (10-14)
Kyndil: David Edvardsen 8, Finnur Hansson 6, Bárður Johannesen 3, Hörður Fannar SigÞórsson 3, Julian Johansen 2, Hans Áki Dal-Christiansen 1, Ludvík Súnason 1.
H71: Bogdan Florea 8, Bogi G. Davidsen 5, Rúni Højgaard 4, Esbern Patursson 3, Hallur Biskopstø 2, Hans Kári Hansen 2, Sigmundur Dahl 1, Sigmundur Nolsø 1
