Tríggir feministiskir aktivistar úr bólkinum, Femen, gjøgnumførdu í gjár eitt mótmæli í eini mosku í Stockholm (myndin), har tær vístu bróstini fyri at mótmæla sharia-lóggávu og at kvinnur verða kúgaðar í islam.
Femen-kvinnurnar, sum vóru Aliaa Elmahdy úr Egyptalandi, Meriam úr Tunis og Jenny A. Wedhammar úr Svøríki, kláraðu at sleppa allan vegin inn í moskuna, áðrenn tær fóru úr sínum svørtu kappum og vístu fram sínar naknu yvirkroppar.
Har høvdu tær skrivað slagorðini Einki sharia í Egyptalandi ella heiminum og Kroppurin er mín og ikki æran hjá nøkrum, og tær róptu eisini Einki sharia og Eingin kúging, áðrenn boðsendu politistarnir fingu fatur í teimum inni í moskuni og fingu koyrt tær út.
Vit vístu islam virðing, tí vit fóru úr skónum, og eisini valdu vit at fremja átakið, meðan ikki so nógv fólk var í moskuni, sigur Jenny A. Wedhammar, sum er talskvinna hjá Femen í Svøríki.
