Fólkaflokkurin hevði tríggjar kvinnur við á fundin. Eg sat leingi og bíðaði eftir at hesar "damurnar" fóru upp á røðarapallin. Eg skuldi bíða leingi. Tí tær sluppu ikki framat røðarapallinum, men sótu ístaðin bara "til pynt" millum menninar, sum skulu veljast, um ikki hesaferð, so til løgtingsvalið.
Tjóveldisflokkurin hevði heldur ikki pláss fyri kvinnunum. Har sat ikki ein einasta við teirra borð. So har komu eingi mergað tjóðveldisorð frá nakrari kvinnu.
Miðflokkurin beinleiðis reypaði á røðarapallinum av at hava flestar kvinnur á listanum. Men ikki ein einasta var við í Norðurlandahúsinum. Ikki ein einasta slapp at siga sín hugsan.
Í Sjálvstýrisflokkinum sær tað út til, at ongar kvinnur eru eftir. Har sótu teir tríggir menninir, sum teir hava at bjóða fram.
Í Javnaðarflokkinum eru vit sannførd um, at tað er best, tá ið bæði kynini eru umboðað eins væl. Tí var Javnaðarflokkurin umboðaður av tveimum kvinnum og tveimum monnum.
Sum ein av teimum fáu kvinnunum, bjóði eg meg fram sum kvinnuligt valevni til fólkatingssessin. Eg fari á fólkatingi at nýta stóra orku upp á at greiða dønum frá føroyska fólkaynskinum um broytingar í viðurskiftunum millum Føroyar og Danmark innan fyri ríkisfelagsskapin.
Far á val og vel samstarv og loysnir. Vel eina javnaðarkvinnu. Gott val.
