Tað heldur Eyðgunn Samuelsen, løgtingskvinna fyri javnaðarflokkin. Hon varð fyrstu ferð vald inn á ting í 2008.
- Politiska spælið er meira nattúrligt fyri menn enn kvinnur. Menn hava ofta lættari við at markera seg og halda seg framat enn kvinnur.
Sjálv hevur Eyðgunn nøkur ár á baki á politiska pallinum, men tað kann tykjast hart fyri eina kvinnu, tá hon er nýggj á økinum.
Hon sigur eisini, at kvinnur hava lyndi til at vera ov sjálvkritiskar, og hetta ger, at tær ofta halda seg aftur.
- Kvinnur vilja vera heilt tryggar í síni søk áðrenn tær vilja úttala seg. Hinvegin halda menn seg sjálvdan aftur, heldur ikki, tá tað snýr seg um økir, sum teir ikki eru serkønir innnan.
Í dag umboða kvinnur ein triðing av løgtinginum. Um tær skulu gerast fleiri, mugu flokkarnir seta hetta á dagsskránna.
- Fyri at fáa fleiri kvinnur á ting, mugu flokkarnir arbeiða fyri tí í tí dagliga, til dømis í nevndararbeiði. Tað nyttar ikki at biða tær koma við fýra vikur áðrenn tær skulu veljast, tá er tað ov seint.
- Um ein kvinna vil koma framm í politikki skal hon vera áhaldin og treisk. Og hon skal ikki taka tað ov nær, um hon fær eitt lítið skump.
