Fá munnu vera so glað fyri netvarpið hjá KVF sum føroyingar uttanlands.
Hjá útisetum er tað ein sera góður hentleiki fyri at fylgja við, hvat rørir seg í Føroyum og nógv teirra virðismeta høgt at síggja føroysku sendingarnar, hóast tey ikki eru stødd í Føroyum.
Beinleiðis tiltøk vera eisini stroymaði á kvf.fo og mangur føroyskur útiseti hevur notið bæði valkvøld og landsdystir á kvf.fo.
So verður ikki í kvøld. Kringvarp Føroya hevur fingið nógvar fyrispurningar frá útisetum, um dysturin verður stroymaður á kvf.fo, men svarið frá stovninum er noktandi.
- Vit hava tíverri ikki sjónvarpsrættindi at stroyma dystin til fólk, sum ikki eru í Føroyum, skrivar Kringvarpið á Facebook-síðu síni.
Føroyingar uttanlands mugu tí leita sær fram onkrar lokalar sjónvarpsstøðir. Í skrivandi stund er vist, at Skysports 1 og Eurosport 2 senda dystin. Ert tú í Keypmannahavn, vísir Føroyahúsið eisini dystin.
