Tórshavnar Kvøld-, Ungdóms- og Listaskúli víðkar í vár tilboðini til eisini at fevna um morgun- og vikuskiftisskeið.
Kvøldskúlin hevur fyrr bjóðað várskeið út, men als ikki í sama vavi sum í ár. Kvøldskúlin hevur eini 30 skeið á skránni í vár. Hetta eru styttri skeið enn tað, fólk eru von við. Hetta eru morgunskeið, vikuskiftisskeið og skeið fyri tvey ættarlið í senn. Harumframt fevnir hetta tilboð um fleiri nýggj skeið, eitt nú skeið fyri orðblind, skeið í teknmáli, filippinskari matgerð, tøving fyri tvey ættarlið, yoga og skeið um diabetes og í at gera vestar til føroysk klæðir.
Orsøkin til, at Kvøldskúlin fer undir hesa ætlan, er tann broytti tørvurin. Fólk vilja millum annað hava víðkaðan fleksibilitet, sigur Jákup Strøm, stjóri í Tórshavnar Kvøld-, Ungdóms- og Listaskúla.
Moderniteturin krevur, at alt hendir skjótt, og broytingarnar eru at kalla støðugar. Tað ber í sær, at alsamt fleiri vilja hava styttri skeið, ið skifta ofta og eru ymiska tíð á degnum.
Kvøldskúlin letur upp fyri tilmelding komandi mánadag á www.kvoldskulin.fo, og tilmeldingin er opin til mánamorgunin 29. november.
Nýggja skrivstovan hjá Kvøldskúlanum í Havn er í J. H. Schrøtersgøtu 1, har prentsmiðja Einars Prent var. Har er opið mánadagin 22. november frá klokkan 18 til 21.
