Á midnátt í kvøld okkara tíð verður tann 42 ára gamli amerikanarin Troy Davis tikin av døgum í einum fongsli í amerikanska statinum Georgia, har hann er dømdur til deyða fyri at hava dripið ein løgreglumann. Málið hevur vakt stóran ans, og í dag og í kvøld hava fólk gingið mótmælisgongu, har tey hava mótmælt, at deyðadómurin verður fullførdur.
Løgreglumaðurin Mark MacPhail bleiv skotin, tá fleiri fólk fótu upp at togast á einum parkeringsplássi ein dagin í 1989. Níggju vitni søgdu, at Troy Davis var drápsmaðurin, men sjey teirra hava seinni tikið frágreiðingina aftur. Tey vilja vera við, at løgreglan noyddi tey at siga tað, sum tey søgdu tá. Ongar dna-kanningar eru gjørdar í málinum, og drápsvápnið er ongantíð funnið. Harafturat hevur Troy Davis alla tíðina noktað seg sekan.
Upprunaliga skuldi Troy Davis takast av døgum í 2007, men avrættingin bleiv útsett eftir boðum frá amerikanska hægstarætti. Men í gjár misti hann tann seinasta møguleikan at fáa avrættingina útsetta, tá myndugleikarnir sýttu fyri at lata hann royna ein sokallaðan lygn-detektor, sum hann hevði biðið um.
Amnesty International sigur, at næstan ein millión fólk hava skrivað undir eitt mótmæli ímóti deyðadóminum ímóti Troy Davis.
